Vellukka klubbstemne

Søndag 17. oktober arrangerte VRK internt klubbstemne i sprang, med klasser frå bom på bakken til 70 cm. Bom på bakken var største klassa, med heile 19 deltakarar! Det vart elles ridd fleire fine, feilfrie runder på stemnet, og det var bra med publikum. Kjekt å endeleg kunne arrangere stemne igjen! Vi håper å få til minst eitt stemne til før nyttår.

10.000 kroner i Drivkraftmidlar

Torsdag kveld kom Sparebank 1 Søre Sunnmøre på besøk til rideanlegget vårt, og med seg hadde dei ein sjekk på 10.000 kroner i Drivkraftmidlar til ein ny rundpaddock! Frå før har klubben samla inn kring 8.000 kroner til tiltaket på Spleis, og vi er no eit steg nærare realisering. Vonleg kan vi sette opp rundpaddock ved utebana til våren.

Det nærmar seg klubbstall

13.-14. oktober vart det støypt plate til klubbstallen og fundament til varmerom i ridehallen. Om få veker byrjar tak og veggar å reise seg, og målet er at leigetakarane kan flytte inn i stallen i god tid før jul. Det må påreknast ein del dugnadsarbeid framover, knytt til montering av stallinnreiing, møblering av salrom og oppsetting av paddockar. Meir informasjon kjem. Det blir kjekt å endeleg få eit komplett hestesportsanlegg i Volda!

Vellukka rideleir

11.-12. september arrangerte Volda rideleir for barn og unge over 9 år. Vi fekk støtte med Magne Haugens Minnefond til gjennomføring av leiren, noko som gjorde at barna fekk delta heilt gratis! Dette var eit populært tiltak, og dei 12 plassane på leiren vart fylt opp på få timar. På leiren fekk barna lære stallstell, stell av hest og påsaling. Vidare fekk dei ri både på tur og bane, og det var lagt opp til ei matpause med teori på slutten av kvar dag. Eit kjekt og vellukka arrangement. Takk til dei som stilte med hestar, stallar og som instruktørar!

Volda rideklubb med i Fritidskortet

Ung og hesteinteressert? Hugs at Fritidskortet til Volda kommune kan brukast til medlemskap og anleggsleige (ridebane og ridehall) til Volda rideklubb. Du finn meir informasjon på https://volda.friskus.com, berre søk på Volda rideklubb i søkefeltet.